ပို့ကုန်ဝင်ငွေစာရင်းမရှင်းလို့အရေးယူခံရတဲ့ကုမ္ပဏီပေါင်း၅၀၀ကျော်ရှိ

ပို့ကုန်ဝင်ငွေစာရင်းမရှင်းလို့အရေးယူခံရတဲ့ကုမ္ပဏီပေါင်း၅၀၀ကျော်ရှိ

ပြည်ပကို ကုန်တင်ပို့ပြီး ပို့ကုန်ရဝင်ငွေစာရင်းကို ပြန်ပြီးမတင်ပြနိုင်တဲ့အတွက် ဗဟိုဘဏ်ဘက်က အရေးယူထားတဲ့ ကုမ္ပဏီပေါင်းက ၅၀၀ ကျော်သွားပြီ ဖြစ်ပါတယ်။ တချို့ကုမ္ပဏီတွေက အမေရိ ကန်ဒေါ်လာ ၇ သန်း နီးပါးလောက်ကို ပြည်တွင်းဘဏ်ကိုလွှဲပြောင်း စားရင်းရှင်းရမှာဖြစ်လို့ ဗဟိုဘဏ်က သတ်မှတ်ထားတဲ့ငွေလဲနှုန်းဟာ ပြင်ပနဲ့ကွာဟနေတာအပါအဝင်နှစ်ကြာတဲ့ စာရင်း ဟောင်းတွေကိုပြန်ရှင်းဖို့ မလွယ်ကူကြောင်း ကုမ္ပဏီတွေဘက်က တုံ့ပြန်ပါတယ်။ 

ပြည်တွင်းကို နိုင်ငံခြားငွေ ( အမေရိကန်ဒေါ်လာကို) အဝင်မပြမိတဲ့အတွက် လိုင်စင်ပိတ်သိမ်း ခံထားရတဲ့ ပို့ကုန်/သွင်းကုန် ကုမ္ပဏီပေါင်း ၅၂၃ခုရှိသွားပြီလို့ ကုမ္ပဏီရေးရာ အကြံပေးလုပ်ငန်း MES က ဗွီအိုအေကို ပြောပါတယ်။ ဗဟိုဘဏ်ရဲ့ဥပဒေပါ ပြဋ္ဌာန်းချက်အတိုင်း ပြည်ပတင်ပို့ကုန်ကရတဲ့ နိုင်ငံခြားငွေအားလုံးကို ကုမ္ပဏီတိုင်းက ရက်၉၀အတွင်းမှာ စာရင်းရှင်းပေးရမယ်လို့ ပြန်ပြီးတင်း ကျပ်လိုက်တဲ့အတွက် အခုလိုကုမ္ပဏီအများအပြား အရေးယူခံရတာပါ။

အရေးယူခံရတဲ့ ကုမ္ပဏီ ၅၀၀ ကျော်က ပြည်တွင်းကိုလွှဲပြောင်းပေးရမယ့် ပမာဏက အမေရိ ကန်ဒေါ်လာ သန်းချီရှိနိုင်တယ်လို့ ခန့်မှန်းနေကြပေမဲ့ ကုမ္ပဏီတခုခုနဲ့တခု မတူတာကြောင့်ဒါကို တွက်ချက်ဖို့တော့ ခက်ခဲတယ်လို့ MES ကပြောပါတယ်။

" ပုံမှန်က အဲဒါတွေအကုန်လုံးက ဟွန်ဒီတို့ ဘာတို့ညာတို့နဲ့ ဝင်ထားပြီးသား။ ဒါမှမဟုတ်ရင် တခြားအင်ပို့လုပ်တဲ့သူတွေကို earning အဝေးမှာလှမ်းရောင်းပြီးတော့ ထွက်ထားပြီးသားဟာတွေ။ ဒါပေမဲ့ အခုကျမှသူတို့က ဒီဟာကိုပြန်ပြီးတော့မှ ဥပဒေအရ ပြန်ပြီးတင်းကျပ်မှု လုပ်လိုက်တဲ့ အခါကျတော့ အဲဒီမှာမဝင်ရသေးတဲ့ဟာတွေက အဝင်ပြရတဲ့အခါကျတော့ တချို့က (ဒေါ်လာ) ၁၀,၀၀၀/ ၂၀,၀၀၀ ကျန်တယ်၊ တချို့က ၃/ ၄၀၀,၀၀၀ ကျန်တယ်။ သုံးလေးသိန်းကျတော့ ကျနော်တို့က ချက်ချင်းကြီး ပြန်ဝင်ဖို့က မဖြစ်နိုင်ဘူး။"

ကုမ္ပဏီပေါင်း ၅၀၀ ကျော်ဆီကရမဲ့ ကြွေးကျန်ပမာဏနဲ့ပတ်သက်လို့ ဗဟိုဘဏ်နိုင်ငံခြားသုံးငွေ စီမံခန့်ခွဲရေး၊ ပို့ကုန်/သွင်းကုန် ဌာနကို ဗွီအိုအေက မေးမြန်းစုံစမ်းဖို့ ဆက်သွယ်ခဲ့ပေမယ့် မရခဲ့ပါဘူး။ နိုင်ငံခြားသုံးငွေစီမံခန့်ခွဲမှုဥပေဒအတိုင်း မလုပ်ဆောင်တဲ့ ကုမ္ပဏီပေါင်း ၁၅၈ ခုက ဒါရိုက်တာ အဖွဲ့ဝင်တွေကိုလည်း နာမည်ပျက် စာရင်းသွင်းပြီး အရေးယူခဲ့တယ်လို့ ဗဟိုဘဏ်က မေလ ၉ရက်က ထုတ်ပြန်ထားပါတယ်။ ဒီလို နာမည်ပျက်စာရင်းကြောင့် လုပ်ငန်းတွေ ပိုပြီးကြန့်ကြာသွားတယ်လို့ လုပ်ငန်းလိုင်စင်အသိမ်းခံရတဲ့ ကုမ္ပဏီပိုင်ရှင်တဦးက ဗွီအိုအေကို ပြောပါတယ်။

" များတော့များတယ် တချို့တွေဆို ဒေါ်လာသိန်း ၇၀လောက်အထိရှိတယ် မနည်းဘူး။ လောလော ဆယ် ကျနော်ဒီဘက်က အခွန်တွေဘာတွေ ဘာမှဆောင်လို့မရဘူး။ သွင်းကုန်လည်း လုပ်မရဘူး၊ ပို့ကုန်လည်း လုပ်မရဘူးဖြစ်နေတယ်။ သူတို့က blacklist လုပ်လိုက်တော့ ဟိုဘက်မှာကျန်နေတဲ့ ကုန်ကြမ်းတွေ ပြန်သွင်းလို့မရဘူး။ မလွယ်လောက်ဘူးဗျ၊ တကယ်တမ်းဆို ကျနော်မသွင်းနိုင်ဘူး။ သူတို့က ဗဟိုဘဏ်က သတ်မှတ်လိုက်တာ (တဒေါ်လာကို) ၁၈၅၀ကျပ်၊ အပြင်ပေါက်ဈေးနဲ့က ကွာသွားတယ်။"

မေလ၆ရက်မှာ ကုမ္ပဏီပေါင်း ၃၄၆ခု၊ မေလ၉ရက်မှာ ကုမ္ပဏီ ၁၅၈ခု၊ မေလ၁၂ရက်မှာ ကုမ္ပဏီ၁၉ခု စုစုပေါင်း ကုမ္ပဏီ၅၂၃ခု လိုင်စင်ပိတ်သိမ်း ခံထားရပါတယ်။ ဒီအထဲမှာ စာရင်းရှင်းပြီးတဲ့ကုမ္ပဏီ တချို့ရှိပေမဲ့ ဒီစာရင်းတွေကို လတ်တလောမှာ မြန်မာစီးပွားရေးနှင့် ကူးသန်းရောင်းဝယ်ရေးဌာနက မထုတ်ပြန်သေးပါဘူး။

ပြည်တွင်းဘဏ်စာရင်းထဲကို ပို့ကုန်ကရတဲ့ နိုင်ငံငွေထည့်သွင်းဖို့ ပျက်ကွက်မယ်ဆိုရင် ဗဟိုဘဏ်ရဲ့ နိုင်ငံခြားသုံးငွေ စီမံခန့်ခွဲမှု ဥပဒေပုဒ်မ ၄၂-က နဲ့ ထောင်ဒဏ်၊ ငွေဒဏ်ချမှတ်ခံရနိုင်ပါတယ်။ ဒါပေမဲ့ ဘဏ်ငွေလွှဲပြီးကြောင်း ကြွေးကျန်မရှိတော့ကြောင်း ဗဟိုဘဏ်ကို တင်ပြီပြီးရင်တော့ စီးပွားကူးသန်းဌာနက လုပ်ငန်းလိုင်စင် ပြန်ဖွင့်ပေးနိုင်တယ်လို့ ကုမ္ပဏီအကြံပေးဝန်ဆောင်မှု MES က ပြောပါတယ်။

ဗွီအိုအေ