Taxation



အခွန်ကင်းလွတ်ခွင့် ( ၆၅ ) ရာခိုင်နှုန်းနဲ့ စတင်လိုက်တဲ့ မြန်မာ - ဟောင်ကောင် ကုန်သွယ်ရေး

အခွန်ကင်းလွတ်ခွင့် ( ၆၅ ) ရာခိုင်နှုန်းနဲ့ စတင်လိုက်တဲ့ မြန်မာ - ဟောင်ကောင် ကုန်သွယ်ရေး google

ဇွန်လ ( ၁၁ ) ရက်က စတင်ပြီး မြန်မာနဲ့ ဟောင်ကောင် ကုန်သွယ်တဲ့အခါ အခွန်သက်သာခွင့် ( ၆၅ ) ရာခိုင်နှုန်းဖြင့် ကုန်သွယ်နိုင်ပြီဖြစ်ကြောင်း အရှေ့တောင်အာရှနိုင်ငံများအသင်းရုံးက ထုတ်ပြန်ခဲ့ပါတယ်။

အာဆီယံ - ဟောင်ကောင် - တရုတ် လွတ်လပ်စွာကုန်သွယ်ခွင့် သဘောတူညီမှု (AHKFTA) အရ အဆိုပါ အခွန်သက်သာခွင့်ကို အရှေ့တောင်အာရှနိုင်ငံများအသင်းရုံးက ထုတ်ပြန်ခဲ့တာဖြစ်ပါတယ်။

မြန်မာ - ဟောင်ကောင် ကုန်သွယ်မှုမှာ အခွန်ကင်းလွတ်ခွင့် ( ၆၅ ) ရာခိုင်နှုန်းကို ( ၁၅ ) နှစ်ပေးရမှာဖြစ်ပြီး နှစ် ( ၂၀ ) အတွင်း နောက်ထပ် ( ၂၀ ) ရာခိုင်နှုန်းကို ထပ်မံ လျှော့ချဖို့ဖြစ်ကြောင်း ဆိုပါတယ်။

‘‘အခုလို အသက်ဝင်တာ အာဆီယံနဲ့ ဟောင်ကောင်ကြားမှာ ကုန်သွယ်မှု ပိုကောင်းလာဖို့ ဖြစ်ပါတယ်။ အာဆီယံနဲ့ ဟောင်ကောင်တို့က နိုင်ငံတကာ ကုန်သွယ်မှုစနစ်ကို ထောက်ခံလိုက်တာပါ။ ကျွန်ုပ်တို့နိုင်ငံတွေကြားမှာ ကုန်သွယ်မှု၊ ရင်းနှီးမြှုပ်နှံမှုတွေကို ပိုအားကောင်းလာစေဖို့ပါ’’ လို့ အာဆီယံအထွေထွေအတွင်းရေးမှူး Lim Jock Hoi က ပြောပါတယ်။

အဆိုပါသဘောတူညီမှုမှာ မြန်မာနိုင်ငံအပါအဝင် ကမ္ဘောဒီးယား၊ လာအိုနိုင်ငံတို့ကိုလည်း ဟောင်ကောင်နဲ့ ကုန်သွယ်တဲ့အခါ အခွန်ကင်းလွတ်ခွင့်ကို အထက်ပါအတိုင်း ပေးရမှာဖြစ်ကြောင်း သိရပါတယ်။

စင်ကာပူနဲ့ ဟောင်ကောင်တို့က အခွန်လုံးဝကင်းလွတ်ခွင့်ဖြင့် ကုန်သွယ်နိုင်ပြီး အင်ဒိုနီးရှား၊ ဗီယက်နမ်တို့ကတော့ ဟောင်ကောင်နဲ့ ကုန်သွယ်ရာတွင် အခွန်သက်သာခွင့် ( ၇၅ ) ရာခိုင်နှုန်းကို ( ၁၀ ) နှစ်အတွင်း ပေးရမှာဖြစ်ပြီး ( ၁၄ ) နှစ်အတွင်း နောက်ထပ် ( ၁၀ ) ရာခိုင်နှုန်းကို ထပ်မံလျှော့ချမယ်လို့ ဆိုပါတယ်။ 

အာဆီယံ - ဟောင်ကောင် - တရုတ် လွတ်လပ်စွာကုန်သွယ်ခွင့် သဘောတူညီမှု (AHKFTA) ကို ၂၀၁၇ ခုနှစ် နိုဝင်ဘာလ ( ၁၂ ) ရက်က ဖိလစ်ပိုင်နိုင်ငံမှာ အာဆီယံစီးပွားရေးဝန်ကြီးများနဲ့ ဟောင်ကောင်ကုန်သွယ်ရေးနှင့် စီးပွားရေးဖွံ့ဖြိုးရေးဌာနမှ အတွင်းရေးမှူးတို့က လက်မှတ်ရေးထိုးခဲ့ကြပါတယ်။

၎င်းသဘောတူညီချက်မှာ အချက် ( ၁၄ ) ချက်ပါဝင်ပြီး လွတ်လပ်သောဈေးကွက်နှင့် ကုန်သွယ်မှု၊ ကုန်သွယ်မှုတွင် ယုံကြည်မှုတိုးမြှင့်ခြင်း၊ ကုန်စည်နှင့် ဝန်ဆောင်မှုကဏ္ဍများတွင် အချက်အလက်များ ပူးပေါင်းဆောင်ရွက်ရေးတို့ ပါဝင်ပါတယ်။ အာဆီယံနိုင်ငံများက လွတ်လပ်သောကုန်သွယ်မှုနိုင်ငံများအဖြစ် တရုတ်၊ ကိုရီးယား၊ အိန္ဒိယ၊ ဂျပန်၊ ဩစတြေးလျ၊ နယူးဇီလန်တို့နဲ့ လက်မှတ်ရေးထိုးထားပါတယ်။

 

Source: 7Day Daily
Myanmar Industrial Directory

Read times Last modified on Wednesday, 19 June 2019 11:24
Rate this item
(1 Vote)